伊豆市【修禪寺‧獨鈷の湯‧竹林小徑】
記錄:2016年9月🌞
👣行程
係菊屋食完早餐 就急急要去附近散下步
呢度有條出名散步路線
係Michelin Green Guide Japan推介
再加上新垣結衣同星野源套日劇<逃げるは恥だが役に立つ>
係第六話温泉之旅中 就係途經嘅「獨鈷之湯」 「竹林小徑」取景
修禪寺
話明修善寺温泉 就梗係要先去「修禪寺」
係虎溪橋上 身後面就係「修禪寺」
外表睇落好樸素
要經一條長梯級 先上到「修禪寺」
眼前嘅景象
呈現 一遍佛門清静地
配合全名「福地山修禪萬安禪寺」
不過呢間寺嘅歷史就唔太清静
據說係弘法大師 807年開創
1193年鎌倉時代初 軟禁過一位將軍至死
七百年後嘅1863年一場大火
燒毀咗好多寶貴歷史文物
好彩仲有個寶物 隱藏係手水舍
呢個唔係一般嘅手水舍
龍頭流出嘅 係溫泉水
全名「桂谷靈泉大師之湯」 由弘法大師所建
「修禪寺」本堂兩旁都有好 茂盛嘅大樹
後面呢直頭成座山嘅樹林呀
可能眾生皆修禪
孤鈷の湯
離出修襌寺 直望對面就見到「獨鈷之湯」
初時唔知「孤鈷」係一舊佛門法器
仲以為係叫「孤獨之湯」
因為佢零零舍舍喺正中間 好孤獨咁
咁點解係「獨鈷」唔係「獨孤」呢
係有段古
話說有日弘法大師路經此地
見到有個孝子係川畔攞水為患病嘅父親洗浴
大師非常感動
就用咗佢嘅「獨鈷」法器
鑿碎舊河石 之後就有温泉水湧出
從此成為伊豆半島最古老溫泉
咁神奇
暫時解釋唔到點解見到孝子後 就要鑿舊河石
但網上資料係咁講囉
嗱 孤鈷之湯係足湯
唔好諗著借意嚟露天裸浴 除鞋除襪唔使除褲
風景又確實幾唔錯
如果秋季嚟 四週係綠黃橙紅葉
再加上自然流水聲 合埋眼以為入咗幽清深山
但一開眼又見到成排屋同停車場 神經錯亂
竹林小徑
日本特別鐘意竹
無論室外室內嘅擺設 都會用到竹
日本人認為竹代表靈活 力量
中華南方習俗就話生竹辟邪 死竹藏陰 屬於陰性植物
今次修善寺嘅「竹林小徑」又完全唔同感覺
小徑唔闊但係啲竹 生得好高好高
除咗新鮮竹 仲有個由乾竹建成嘅迴旋處
係一個特別冇俾啲高竹遮住太陽嘅地方
好自然會望上天空
係香港 見到乾竹通常係地盤撘棚
💬激腸體驗
- 修善寺温泉雖然係觀光熱點 遊客亦唔少 不過係冇一般遊客區果種熱哄哄氣氛 反而大家都好似嚟避靜 修禪 係好有共識咁保持果種清幽氣氛
ℹ修禪寺‧獨鈷の湯‧竹林小徑
沒有留言:
發佈留言